Opisyal na nga nagbukas ang 2024 Paris Olympics kaina sang kaagahon, July 27, oras diri sa Pilipinas.
Wala nangin rason ang ulan agud nga indi madayon ang parada sang mga delegasyon sa Seine River kun sa diin nagsakay sa mga vessels ang mga delegates sang tagsa ka pungsod kag natapos ang parada sa Trocadero, malapit sa Eiffel Tower.
Wala man nakapanubo ang ulan sa game spirit sang 22 Filipino athletes kun sa diin ginpangunahan nanday Olympic silver medalists kag boxers Nesthy Petecio kag Carlo Paalam ang delegasyon sang Philippines’ boat.
Ini sa karun ang ika-100 na nga kahigayunan nga nagpartisipar ang Pilipinas sa Olympics.
Sa iya nga speech, ginpahayag ni International Olympic Committee president Thomas Bach nga ini ang kahigayunan agud nga maghugpong ang mga atleta nagikan sa bilog nga kaliubutan.
Iya man ginpasalamatan ang gobyerno sang France sa mainit kag pinasahi nga pagwelcome sa tanan nga delegasyon.
Opisyal man nga gin-welcome ni French president Emmanuel Macron ang kapin sa 7,000 athletes nga magahampang sa Paris Olympics.
Samtang, tuman ka strikto ang pagbantay sa opening ceremony sang Paris Olympics 2024 nga ginpatigayon sa France.
Sa interview sang Bombo Radyo Bacolod kay Monico Puentevella, subong pa gid lamang nga ginpatigayon sa Siene river ang opening ceremony kun sa diin nagparada ang delegasyon.
Suno diri, pila lamang ka mga Filipino athletes ang naka-upod sa opening bangod iban ang yara sa training.
Nakita man sini ang mga atleta nga tuman ang kalipay sa pagpartisipar sa olympics amo nga nagapangayo ini sang suporta para sa mga Filipino athletes para magdaog kag makapauli nga may dala nga medalya.
