Nadugangan ang numero sang patay bangud sa dengue sa ciudad sang Bacolod subong nga tuig.
Santo sa data nagikan sa Bacolod City Health Office, nagsaka na sa duha ang patay bangud sa dengue humalin sang Enero 1 tubtub Hunyo 15.
Nagdangat naman sa 438 ang kabug-usan nga kaso sang dengue sa ciudad sa amo nga period.
Sa interview sang Bombo Radyo kay Dr. Grace Tan, head sang sanitation and environment division sang CHO, mas mataas sang 57 porsyento ang suspected dengue cases subong nga tuig kun ipaanggid sa kaangay nga period sang tuig 2018 nga nagdangat sa 279.
Apang mas mataas naman ang numero sang patay tinalikdan nga tuig nga nagdangat sa tatlo.
Suno kay Tan, naga-edad sang pito ka bulan tubtub 87 anyos ang edad nga nagmasakit sang dengue apang pinakamadamo ang naga-edad sang isa tubtub napulo ka tuig.
Nagikan sa 61 ka mga barangay sa Bacolod, ang thickly-populated areas gihapon ang may pinakamadamo nga dengue patients nga ginalakipan sang Estefania, Tangub, Pahanocoy, Taculing, Granada, Handumanan, Mansilingan, Alijis kag Singcang.
Bangud sini, padayon ang panawagan sang CHO sa mga residente nga limpyuhan ang palibot agud indi magdamo ang lamok kag indi na madugangan ang magamasakit sang dengue.
