Patay ang isa ka empleyado sa pribado nga kumpaniya sa ciudad sang Bacolod matapos mabungguan sa pedestrian lane sa Barangay Tangub subong nga Lunes sang aga.
Nagatabok sa pedestrian lane ang biktima nga si Wilfredo Castillo sang Purok Pag-asa, Barangay Tangub sang ini ang nabungguan sang motorsiklo nga ginamaneho ni Charlie Tejada sang banwa sang Cauayan kag may duha ka mga angkas nga padulong sa north direction.
Naglabog pa sang pila ka metros si Castillo kag bangud sa patal nga pilas nga gin-agom sini, gilayon nga ginbawian sang kabuhi ang biktima.
Samtang pilason man si Tejada kag ang isa pa gid ka angkas nga si Jose Aligato sang banwa man sang Cauayan.
Suno sa anak ni Castillo, nagatrabaho sa pribado nga kumpaniya sa Barangay Pahanocoy ang iya amay kag manugretiro na kuntani sa bulan sang Abril.
Suno diri, ginhambalan kaina sang iya manghod nga indi lang anay magduty ang iya amay bangud nagalain ang pamatyag sini.
Ginsundan pa ini sang manghod sang nagpadulong sa highway kag nakibot na lamang nga may naglagapok kag nakit-an na lamang nga nabungguan na ang iya amay.
Kadungan sini, nagpangabay ang anak nga Castillo sa mga nagamaneho sang motorsiklo nga maghinay lang kun maglabay sa pedestrian lane.
Suno kay Police Officer Randy Abello, traffic investigator sang Bacolod Police Station 8, kun basehan ang impact sang pagkabunggo kay Castillo, posible nga madasig ang dalagan sang motorsiklo.
