Nagsaka na sa 11 ang narekord nga persons under investigation (PUIs) angot sa coronavirus disease 2019 (COVID-19) nga naka-admit karon sa mga medical facility sa Bacolod.
Ginkumpirmar ni Dr. Grace Tan, spokesperson sang Inter-Agency Task Force againts coronavirus sa ciudad nga sa 11 ka mga PUIs, tatlo diri ang mga lalaki samtang walo naman ang mga babayi.
Apat ang nagikan sa out of town samtang pito naman ang naghalin sa Bacolod.
Apat man sa mga ini ang may yara sang travel history abroad kag ang nabilin ang may yara sang local travel history sa mga lugar sa pungsod nga may kaso sang COVID.
Suno kay Tan, ila pa ginahulat ang resulta sang swab test sang pito ka mga PUIs samtang ang apat naman ang nakatalana pa lang nga kuhaan sang swab samples.
Dugang pa sini nga may yara karon sang 410 ka mga persons under monitoring (PUMs) sa ciudad.
Ang mga PUMs ang may yara sang travel history sa abroad kag sa Manila.
Kinahanglan sang mga ini nga sundon ang 14-day home quarantine bangud wala man sila sang may nabatyag nga sintomas sang balatian.
