Padayun ang monitoring sang Philippine Institute of Volcanology and Seismology (PHIVOLCS) La Carlota City substation sa posibilidad sang liwat nga pagluntad sang lahar flow ilabi na nga ginapaabot ang pag-ulan ulan sa probinsya sang Negros Occidental.
Sa interview sang Bombo Radyo Bacolod kay Darryl Arro, science analyst gikan sa PHIVOLCS La Carlota, nagapabilin sa Alert Level 2 ang Bulkan Kanlaon, samtang may ma-obserbahan gihapon nga degassing nga nagadangat sa kataason nga 1,500 meters.
Sa seismic survey nga ginpatigayon kahapon, sila ang nakarecord sang sulfur dioxide gas sa average nga 3,464 tonnes per day.
Aminado naman si Arro nga segisegi ang seismic activities sa bulkan, apang ini ang mas manubo naman kun ipaanggid sa seismic activities sang maglupok ang bulkan.
Padayun naman nga ginadumilian ang pagsulod sa 4km radius permanent danger zone, samtang ang nabagatnan nga bahin sang Canlaon Volcano naman ang labi nga apektado.
Sila ang nag-issue man sang lahar advisory, nga natrigger sang mabaskog nga ulan sa summit nga amo ang nagwash-out sang mga abo kag bato kag nagdaludo paidalum pinaagi sa mga water channels kaangay sang suba kag sapa.
Paathag ni Arro nga normal lamang ang lahar flow matapos ang eruption.
Ini ang padayun man nila nga ginabantayan ilabi na nga sa forecast sang state weather bureau PAGASA mangin maulanon ang panahon sa probinsya.
Antes ang alas-12:00 sang udto nagbubo ang mabaskog nga ulan sa banwa sang La Castellana.
