BACOLOD CITY — Gin-athag sang Provincial Health Office sang Negros Occidental nga wala sang outbreak sang rabies sa probinsya ilabi na sa banwa sang Cauayan.
Ini ang paathag nga ginpagwa ni Dr. Ernell Tumimbang matapos ang report nga duha ka persona ang napatay sa banwa sang Cauayan ilabi na sa Barangay Isio kag Tuyom bangud sa makamamatay nga virus.
Suno kay Tumimbang, indi madeklarar nga biktima sang rabies ang pasyente kun wala sang kumpirmasyon halin sa test nga patigayunon sang Department of Health, sa baylo isa gid lamang ini ka probable case.
Sang Huwebes, nagpadulong na sa banwa sang Cauayan ang mga personnel sang DOH agud nga magpatigayon sang imbestigasyon kag sila ang magasubmit sang report sa masunod nga mga inadlaw.
Sa karun, nakig-angot na ang PHO sa pamilya sang mga biktima agud nga mahatagan sang prophylaxis kag mapunggan ang paglapta pa sang virus nga halin sa ido.
Nagpanugyan naman si Tumimbang sa publiko nga indi magkaon sang karne sang ido bangud indi mapatay ang rabies virus bisan sunugon pa ang panit sini.
