BACOLOD CITY — Kanselado tubtub bwas nga adlaw ang klase sa Rafael B. Lacson Memorial High School sa ciudad sang Talisay bangud sa pagka-possess sang malain nga espiritu sa pila ka mga estudyante diri.
Kaina sang aga, tatlo ka mga babayi nga estudyante sa Grade 12 ang ginsaniban samtang nagaklase sa diin naglain ila ang tingog, indi maintindihan ang ginawakal kag nagawaras.
Sila ang ginapunggan sang napulo nila ka mga classmates apang indi makasarang ang pwersa sang mga ini.
Sa impormasyon nga nakuha sang Bombo Radyo, hinali lang naglain ang behavior sang mga natungdan kag nakit-an sa blackboard ang magagmay nga mga footprints nga mapaanggid sa iya sang lapsag.
Nag-abot ang mga pastor sa eskwelahan agud nga magbulig sa mga manunudlo sa pag-pray over kag nagpangamuyo man ang tanan nga mga estudyante sa senior high school building amo gani nga naumpawan ang mga gin-possess.
Matapos nga nadala sa clinic ang mga estudyante, ginpahanugutan naman sila nga makapauli.
Gilayon naman nga ginpa-blessingan sa pari sa Talisay ang senior high school building.
Suno sa source sang Bombo Radyo nga nagpahinago sang iya pangalan, indi ini ang labing una nga kahigayunan nga may gin-possess diri bangud sang nagligad nga semana kag sang Martes, Hulyo 18, may ginsaniban man apang tag-isa lang ka estudyante.
Santo sa impormasyon, ang ginahamtangan sang senior high school building ang gina-istaran sang una sang abortionist sa ciudad sang Talisay.
