Nagsugod na ang pila ka mga barangay sa ciudad sang Bacolod sa pagpanagtag sang information form agud nga matumod sang COVID vaccination council ang numero sang mga residente nga luyag magpabakuna batok sa coronavirus.
Suno kay Association of Barangay Captains president Lady Glez Gonzales-Pallen, ang iban nga mga barangay ang nagsugod na sa pagpanagtag sang form samtang ang iban naman ang nagatutok pa sa measles, rubella kag polio vaccination.
Ang Barangay Taculing naman nga ginapamunuan ni Pallen, sa masunod nga semana sila magasugod sa pagpanagtag sang pormas bangud nakatutok pa sa karon ang mga barangay health workers sa MRPV.
Sa tion nga magsugod na ang distribution suno kay Pallen, magalibot sa barangay ang mga miyembro sang Barangay Health Emergency Response Team members, apang iya gin-athag nga indi man mandatory ang pagpabakuna.
Suno sa ABC president, dako ang pagpanghangkat sa ila nga mga barangay officials bangud santo sa iya nga paglibot, mas madamo ang mga pumuluyo nga indi luyag magpabakuna sangsa gusto.
Suno kay Pallen, kinahanglan sang information drive agud makaintindi ang mga tawo angot sa COVID vaccination.
