Malinong sa karun ang sitwasyon sa Brgy Tapi, ciudad sang Kabankalan kasunod sa nagluntad nga engkwentro sa tunga sang New People’s Army kag Philippine Army.
Sa interview sang Bombo Radyo Bacolod kay Punong Barangay Giovanni Ibaniez, may apat ka pamilya nga gin-evacuate nga nag-eksperyensya sang trauma.
Suno diri, nagpalapit ang NPA sa balay sang isa ka pamilya kag nag-ayo nga magtinir didto.
Wala una nagpasugot ang pamilya apang nagpasalig ang NPA nga indi man sila magdugay didto.
Pagkasunod nga adlaw sang ginbalikan sang pamilya ang ila balay yara man sa gihapon ang NPA nagatinir didto.
Sang kaagahon nagluntad ang engkwentro kun sa diin nasalabat pa ang amay sang pamilya samtang nagapamubod sang manok.
Sa engkwentro, may tatlo ka NPA nga napatay nga nakit-an sa sulod sang balay, kag sa pagbalik sa area may yara sang dugang ka apat nga bangkay sang NPA nga nakit-an.
Ang mga napatay ang ginkilala nga sanday sanday Jhonrey Mejares, alias “Jai/JR”, political instructor ukon political guide; Glendel Tinio Mejares, alias “Ayin”, isa ka medical officer; Charity Amacan, alias ” Cha/Leah”, isa ka Squad leader kag anay secretary sang South East Front, Reniel Locsin Cello, alias “Kumpol/Adie”, isa ka squad leader; kag si Mary Jane Magquilat, alias ” Shonie/Chinchin/Shedi”, vice squad leader kag asawa ni alyas Kumpol; Jhon Isidor Supelanas, alias “Dalia”, political instructor; kag amo si alias “Pitong”, medical officer.
Ini ang moyembro sang remnants sang South East kag South West Front kag nagtingob agud mangin isa ka grupo.
Samtang nagtingob man ang 11th Infantry Battalion, 15th Infantry Battalion kag 47th Infantry Battalion sa idalum sang 302nd Infantry Brigade.
Sa karun padayon pa ang clearing opeartion sa area sa ginapatihan nga may yara pa sang mga nakapalagyo nga NPA.
