Mas pabor si Punong Barangay Ricky Mijares sang Barangay Banago, Bacolod City nga madayon ang 2020 Barangay and Sangguniang Kabataan Elections sa baylo nga iisol sa tuig 2023.
Sa interview sang Bombo Radyo Bacolod kay Mijares, ginpahayag sini nga mas maayo kun magpatigayon sang eleksyon sa masunod nga tuig bangud may yara sang iban nga pumuluyo nga luyag maghatag man sang serbisyo sa ila nga barangay.
Apang, pananglitan nga mapasar ang hagna nga magasaylo sang Barangay kag SK elections sa ikaduha nga Lunes sang Mayo sa tuig 2023, suno kay Mijares, dapat na lamang ini nga sundon.
Suno diri, may maayo man nga matuga kun mapalawig ang ila termino sa barangay.
Paathag sini, kun ma-postpone ang eleksyon, mapadayon pa nila ang proyekto nga ila nasuguran sa pagpungko nila sa pwesto sini nga tuig.
Nahibaluan nga sang Martes, nakalusot na sa House Committee on Suffrage and Electoral Reforms ang pag-postpone sang 2020 Barangay kag SK elections.
