Ginpanginwala sang mga katapo sang Bacolod City Legal Enforcement Unit ang mga alegasyon nga ila ginaluto kag ginasud-an pagpanyaga ang isda nga ila nakumpiskar sa isa ka vendor nga ila nga nadakpan nga nagabaligya side walk.
Sa interview sang Bombo Radyo Bacolod kay Bacolod City Legal Enforcement Unit Head Rey Demisana, gin-athag sini nga nagahatag sila sang warning sa tanan nga vendors antes ang pagkumpiskar sang mga baligya kag ila man ginapahibalo nga wala ginapahanugutan ang pagbaligya sang isda sa gwa sang merkado bangud indi ini patas sa mga nagabaligya sa sulod sang Libertad.
Dugang pa ni Demisana, nga maagmay nga isda ang nakumpiskar sang iya enforcement team halin sa vendor nga naglapas sa pagsulundan kag malayo ini sa mga litrato nga gin-post sa social sang tagreklamo nga naga-angkon sa mga isda nga ginluto sang mga katapo sang City Legal Office bangud suno sa ila, ginbakal nila ini.
Gin-athag man ni Demisana, nakahimo sang resibo kag blotter report ang Enforcement Team matapos nga makumpiskar ang mga baligya sang vendors sa indi otorisado nga lugar nga nagahatag man sang problema sa dalanon.
Gin-athag pa ni Demisana nga kun may yara sang makumpiskar nga ginabaligya kaangay sang isda, may yara man sila sang storage nga ginabutangan kag siya lamang ang mahimo makabukas sini kag wala na sang iban pa.
