Gin-athag sang pinuno sang National Bureau of Investigation-Bacolod nga wala sang relief order nga ginrelease para kay Special Agent William De Arca bangud sa insidente nga pagbilin sang utod nga parte sang lawas sang tawo sang Biyernes sa gwa sang talatapan sang ahensya.
Madumduman nga sang Biyernes, may nasapwan nga sako sa kilid sang NBI service vehicle kun sa diin ginsulod sa bag sang clothing line ang utod nga nawala nga kamot; nawala nga tiil kag pares sang dulunggan kag nakasulat ang “Willial De Arca Protector ni Hanz Lopez ang Drug Lord”.
Sa interview sang Bombo Radyo Bacolod kay Atty. Renoir Baldovino, wala sang relief order si De Arca kag ini ang padayon nga nagaduty sa NBI-Bacolod.
Suno kay Baldovino, indi man matuod ang impormasyon nga may yara sang indi pag-instindihanay sa opisina sang NBI-Bacolod bangud ang personnel ang intact.
Ginpahayag man sang NBI-Bacolod Head nga may yara na sang gintukod nga task force ang NBI central office nga magpatigayon sang parallel investigation bangud nadalahig ang pangalan sang NBI personnel.
Samtang nagapadayon man ang imbestigasyon sang mga kapulisan agud nga matumod ang motibo kag nagbilin sang parte sang lawas sang tawo sa gwa sang opisina sang nasambit nga ahensya.
