Nagdangat na sa pito ang napatay samtang isa ang nasamaran sa nagluntad nga engkwentro sa tunga sang remnants sang New People’s Army kag 15th Infantry Battalion kag 47th Infantry Batallion sang Philippine Army sa Sitio Candiacap, Purok Maghirupay, Barangay Tapi, Kabankalan City, Negros Occidental kaina sang kaagahon.
Santo sa inisyal nga impormasyon kapin napulo tubtob 15 ka mga katapo sang remnants sang NPA ang nakaengkwentro sang militar.
Samtang sa lates update nga nakuha sang Bombo News Team, nagdangat na sa pito ang napatay sa nagluntad nga engkwentro.
Ini ang ginalakipan sang apat ka mga babayi kag tatlo ka mga lalaki.
Pila sa mga napatay ang ginkilala nga sanday Alyas Kumpol kag Chin Chin Maguillas.
Sa interview sang Bombo Radyo Bacolod kay Punong Barangay Giovanni Ibaniez, sang Barangay Tapi, Kabankalan City, nakibot lamang sila kaina sang kaagahon nga may nagluntad nga engkwentro.
Suno kay Ibaniez, indi pa sila makasulod sa karun bangud nagapadayon pa ang clearing operations sang Philippine Army.
Suno diri, may yara sang isa naman ka sibilyan ang nasalabat matapos maigo sang bala sa guya.
Gindala sang katapo sang Philippine Army ang nasamaran nga sibilyan sa Kabankalan City Hospital.
Ang nasalabat ang isa ka Person With Disability.
Wala pa sa karun sang impormasyon ang punong barangay kun may yara pa sang iban nga nasamaran sa nagluntad nga engkwentro.
Nagpasalig man ang punong barangay nga nakahanda ang barangay sa paghata sang bulig sa mga apektado nga mga residente ilabi na sa nag-evacuate bangud sa nagluntad nga engkwentro.
Nagpadulong man sa lugar si Kabankalan City Mayor Benjie Miranda.
Sa karun, nag-abot na ang miyembro sang punerarya agud nga magkuha sang mga bangkay apang indi pa makasulod sa encounter site bangud wala pa sang clearance halin sa militar.
