Nagpungko na bilang full-fledged director sang Bacolod City Police Office si Police Col. Joeresty Coronica sang Agosto 27.
Sa interview sang Bombo Radyo kay Coronica, humalin sang gin-assign ini bilang director sang BCPO sang Hulyo 23 tubtob Agosto 22, natigayon nga naaresto ang 31 ka mga drug personalities kun sa diin nagdangat sa 724 grams sang illegal nga druga ang nakumpiskar nga may standard drug price nga kapin sa P5 million.
Samtang, 42 naman ka mga wanted persons ang naaresto kag 70 individual ang nadakop sa illegal gambling.
Suno kay Coronica, mabudlay para sa ila ang pagdakop sa mga drug personalities bangod nga indi na grupo ang kalabanan nga involved sa illegal nga druga kag madamo na sang mga connections sa iban nga lugar.
Sa pihak nga bahin, ginpasalamatan naman sini nga sa pagpungko sini bilang BCPO director, wala sang shooting incident nga nagluntad.
Samtang, lauman naman sa masunod nga semana nga may matabo nga reshuffling sa mga station commanders.
Nagapangayo sa karun si Coronica sang suporta kag pag-intindi gikan sa mga pumuluyo sa inconvenience nga matuga sang ila nga trabaho para mapabilin ang peace and order sa ciudad sang Bacolod.
