Patay ang isa ka police matapos nga maaksidente sa Larena St., Barangay Poblacion, Guihulngan City, Negros Oriental kaina sang kaagahon, Hulyo 21.
Ginkilala ang biktima nga Police Lt. John Dale De Roma Mayo, 25 anyos, single, residente sang Pola, Oriental Mindoro kag nadestino sa 2nd Provincial Mobile Force Company (PMFC) 3rd Maneuvering Platoon nga nakabase sa Barangay Buenavista sa nasambit nga ciudad.
Sa interview sang Bombo Radyo Bacolod kay Police Lt. Stephen Polinar, spokesperson sang Negros Oriental Police Provincial Office, ang biktima ang nagpatigayon sang surveillance nga may kaangtanan sa target sang patigayunon nga police operation.
Suno kay Polinar, indi sini mapat-od kun nangin negatibo ang resulta sang pagsurveillance sang biktima kag bangud sa frustration naghalin ini sa lugar.
Pag-abot sa lugar sang aksidente, nadulaan sang control ang police sa ginamaneho nga motorsiklo.
Dugang ni Polinar, nakasuksok man sang full face helmet ang biktima apang bangud sa impact, ginbawian ini sang kabuhi.
Suno diri, ginatinguhaan sa karun sang NOPPO nga madala ang bangkay ni Mayo pauli sa lugar sini sa Pola, Oriental Mindoro.
