Sa pihak sang pag-obserbar sang Semana Santa, nagapahanumdom ang kapulisan sa publiko nga likawan gid ang paghimo sang mga prank call, ilabi na gid sa mga emergency hotline sang pulis.
Sa interview sang Bombo Radyo Bacolod kay Police Brigadier General Arnold Thomas Ibay, Regional Director sang Police Regional Office Negros Island Region, ginbutang sa full alert status ang tanan nga pwersa sang kapulisan agud masiguro ang kalinong kag katawhayan sa bug-os nga rehiyon.
Samtang, pahanugyan ni Ibay, ang 911 emergency hotline ang dapat tawagan lamang sa matuod nga emerhensya bangud ginarespondehan ini gilayon sang kapulisan agud i-validate ang report.
Dugang pa diri, ang mga prank calls ang makauyang sang oras sang kapulisan, nga mahimo tani magamit sa mas importante nga sitwasyon.
Suno diri, sa tion nga ma-identify ang prank callers, sila ang mangatubang sang kaso kag hatagan sang nagakaigo nga penalidad.
Sa pihak nga bahin, suno kay Ibay, ginapatuman ang maximized visibility sang mga kapulisan sa nagkalain-lain nga lugar nga ginadumalahan sang madamo nga tawo kaangay sang mga pantalan, mga mall, mga simbahan, pati na sa mga residential areas.
Mensahe ni Ibay, sa sini nga tion sang Semana Santa, ginapanawagan sang kapulisan ang bug-os nga kooperasyon sang publiko agud mapadayon ang malinong kag hilway sa peligro nga selebrasyon.
