Confident ang political analyst nga wala sang matabo nga World War 3 sa pihak sang paggini-os sa West Philippine Sea bangud sa deterrence sang Estados Unidos.
Sa interview sang Bombo Radyo Bacolod kay Atty. Jomax Ortiz, wala sang may luyag nga matabo ang World War 3.
Suno kay Ortiz, ang mga nagakatabo sa West Philippine Sea kaangay sang lamang sang pagdeploy sang duha ka mga US Warship nga ginalakipan sang USS Higgins (DDG-76) kag USS Cincinnati (LCS-20) ang isa lamang ka deterrence ukon pagpabutyag nga nakahanda ang Amerika nga pangapinan ang Pilipinas.
Ini matapos nga nagbungguay ang duha ka Chinese vessel kasunod sang paglagas sang mga ini sang barko sang Philippine Coast Guard.
Sang Lunes, nagpadulong sa Bajo de Masinloc ang mga personnel halin sa Philippine Coast Guard (PCG) kag Bureau of Fisheries and Aquatic Resources (BFAR) agud maghatag sang ayuda sa mga Pilipino nga manugpangisda, kabahin sang ginapatuman nga Kadiwa program.
Apang ginreport sang PCG nga pila ka barko sang China ang nagpang-harass sa ila pinaagi sa paggamit sang water cannon, delikado nga maneuvers, kag pag-sunod sa ila mga barko.
Sa tunga sang tensyon, nagbunggu-anay ang duha ka Chinese vessels, ang People’s Liberation Army Navy (PLAN) 164 kag ang China Coast Guard (CCG) vessel 3104 samtang nagasunod sa BRP Suluan sang PCG.
Bangud sini, nakaangkon sang dako nga kahalitan ang barko sang CCG nga ginkabig nga indi na seaworthy.
Samtang, naguba man ang flagpole sang barko sang PCG.
Suno kay Ortiz, ang deployment sang warship sang US sa West Philippine Sea ang nagapakita ukon nagahatag sang mensahe sa China nga ingkaso ano man ang matabo yara sila sa likod agud nga pangapinan ang Pilipinas.
Dugang pa sini nga may yara sang nagakatabo nga alliances sang mga pungsod kun sa diin pangapinan sang mga ini ang tagsa tagsa.
Dako man ang pagsalig sini nga wala sang World War 3 bangud nagapatunga ang Estados Unidos bangud kun wala ang nasambit nga pungsod mangin magamo ang kalibutan.
Ang Estados Unidos ang may yara sang masobra 300 ka mga military bases sa bug-os nga kalibutan gani nagaduda ini nga iduso gid sang China ang pagsalakay sa Pilipinas kag Taiwan.
Samtang ang rason sang paghingabot sang China sa West Philippine Sea amo ang economic bangud sa natural gas kag iban pa nga makuha didto.
