Ginkumpirmar sang Malacañang nga naghatag na sang clearance si President Ferdinand Marcos Jr. sa Bureau of Internal Revenue (BIR) nga buksan ang tax records ni Vice President Sara Duterte kag sang iya bana nga si Atty. Manases Carpio.
Suno kay Palace Press Officer Undersecretary Claire Castro, ginhatag sang presidente ang kinahanglan nga approval bilang pagtuman sa layi kag sa proseso.
Sa idalom sang Section 71 sang National Internal Revenue Code, mahimo buksan kag usisaon ang tax records paagi sa mando sang Presidente sang Pilipinas.
Suno kay Castro, ginsumiter na sang BIR ang tax records sang Bise Presidente sa Senado, kag yara na sa impeachment court ang desisyon kun paano ini gamiton sa trial.
Ginpaathag ni Castro nga indi dapat pagkabigon nga may lakot nga pulitika ang desisyon sang presidente bangud nagasunod lamang ini sa husto nga proseso.
Suno naman kay House prosecutor Terry Ridon, nagadamo na ang ebidensya nga ginsumiter sa korte lakip na diri ang iban pa nga dokumento may kaangtanan sa ginabanta P6.7 billion transaction sang mag-asawa nga Duterte-Carpio.
