Nagpagwa sang marching order si President Ferdinand “Bongbong” Marcos Jr. nga magpatigayon sang audit kag performance review sa mga flood control projects sa tagsa ka mga rehiyon sa pungsod.
Ini kasunod sang pagsita niya sa mga palpak nga mga proyekto bangud nga ginkurakot sang mga natungdan nga opisyal matapos nga ginpondohan sang dako.
Ginmanduan ni Marcos ang DPWH nga magsumiter gilayon sa iya opisina sang listahan sang natumod nga mga proyekto sa tanan nga rehiyon nga naumpisahan kag natapos sa nagligad nga tatlo ka tuig.
Pagausisaon sang Regional Project Monitoring Committee ang listahan sang amo nga mga proyekto kag magahatag sang report sang mga wala matapos kag ang mga ginaalegar nga “ghost projects.”
Ang mga pumuluyo ang mahimo man nga magtsekyar sang mga proyekto agud nga mahibaluan man sang mga ini kun paano ginagasto sang gobyerno ang ila nga kwarta.
