Ginsaksihan ni President Ferdinand Marcos Jr., ang pagpirma nanday Defense Secretary Gilberto Teodoro kag Japanese Foreign Minister Kamikawa Yoko ang Philippines-Japan Reciprocal Access Agreement.
Ang pagpirmahanay ang ginpatigayon sa Malacañang Palace kaina sang aga.
Pabakuron sang nasambit nga kasugtanan ang military cooperation sa tunga sang duha ka pungsod paagi pagbayluhanay sang military drills and exercises sa tunga sang mga suldado sang Pilipinas kag Japan.
Nahibaluan nga ang RAA ang nadihon sa inaugural Philippines – Japan Foreign and Defense Ministerial Meeting sadtong April 2022 nga ginhimo sa Tokyo, Japan.
Samtang subong nga adlaw, pormal nga pagabuksan ang ikaduha nga defense kag
security talks ukon 2+2 meeting sa pungsod, kun sa diin, ginalauman nga diskusyunan ang isyu sa bilateral, defense kag security nga nakaapekto sa rehiyon.
Magatambong diri ang Department of National Defense kasubong man ang iban pa nga delegasyon nagikan sa Department of Foreign Affairs kag Department of Justice.
