Ginpasalig ni Presidente Rodrigo Duterte sa pamilya Garcia nga mahatagan sang hustisya ang kamatayon nanday Councilor Michael Garcia kag anay punong barangay Mark Garcia.
Sa pagpadulong sang presidente sa Moises Padilla kaina sang kasisidmon, naistorya sini si Vice Mayor Ella Celestina Garcia-Yulo antes ang iya command conference sa mga opisyal sang Philippine National Police kag Armed Forces of the Philippines sa Moises Padilla Elementary School.
Nagpadulong man sa eskwelahan si Moises Padilla Mayor Magdaleno Peña apang gin-istorya sila sang presidente sa magkatuhay nga hulot.
Sa interview kay Yulo, ginpahayag sini nga malip-ot lamang ang istoryahanay nila sang presidente apang ginpasalig sini nga mahatagan sang hustisya ang pagkapatay sang iya utod nga si Mark kag hinablos nga si Michael sang gin-ambush ang iya convoy sa Barangay Inolingan sadtong Abril 25.
Sa pagbiya ni Peña sa eskwelahan, nagbalibad ini nga maghatag sang statement sa mga katapo sang media tuhoy sa naistoryahan nila sang chief executive.
