Liwat naman nga nagpatuman ang mga fuel retailers sang price hike para sa diesel subong nga semana.
Nagdangat na sa P20 kada litro ang ginsaka sang presyo sang produktong petrolyo bangud sa mga asod-asod nga price increase humalin pa sa pagsugod sang tuig.
Sa nagkalain-lain nga advisories, ang Chevron Philippines Inc. (Caltex), Petron Corp., Seaoil Philippines Corp. kag Shell Pilipinas Corp. ang wala sang price adjustment sa presyo sang gasolina, apang may price hike sa diesel kag kerosene nga P0.60 kada litro.
Samtang ang Cleanfuel, Petro Gazz, kag Unioil Petroleum ang nagpatuman sang pareho nga price adjustment magluwas sa kerosene nga wala sa ila produkto.
Ginpatuman ang price adjustment alas-6:00 kaina sang aga magluwas sa Cleanfuel nga magapatuman alas 4:01 karun sa hapon.
Ang net adjustment sa sini nga tuig ang nagdangat na sa P20.50 kada litro para sa gasolina, P20.85 para sa diesel, kag P5.55 para sa kerosene.
