Atensyon sa mga motorista, epektibo subong nga adlaw, Agosto 6, may yara sang gamay nga pagnubo sa presyo sang produktong petrolyo.
Sa separado nga advisories, Chevron Philippines Inc. (Caltex), Flying V, Petron Corp., Seaoil Philippines Corp. kag Shell Pilipinas Corp. ang nagpatuman sang pagnubo nga 10 centavos sa kada litro sang gasolina, 20 centavos sa kada litro sang diesel kag 45 centavos sa kada litro sang kerosene.
Ang Cleanfuel, Petro Gazz, PTT Philippines Corp., kag Unioil Petroleum Philippines Inc. sang pareho nga price adjustments magluwas nalang sa kerosene nga wala sa ila nga produkto.
Ang adjustments ang nag-epekto alas 6:00 ang takna kaina sang aga sa tanan nga oil firms magluwas nalang sa Cleanfuel nga nagpatuman sang price adjustments alas 12:01 ang takna kaina sang kaagahon.
Suno kay Department of Energy (DOE) Industry Management Bureau Director III Rodela Romero, ang mahina nga demand sa China kag ang plano sang organisasyon sang Petroleum-Exporting Countries agud mapasanyog ang global supply amo ang rason sang pagnubo sa presyo sang gatong.
Samtang ang tensyon naman sa Middle East kag ang paghina sang oil inventory sa United States ang nagapataas naman sang presyo sang gatong kag nagapanubo sa ginapatuman nga rollback.
