Nagapanguna ang probisnya sang Negros Occidental sa may pinakamadamo nga bulawan nga medalya sa ginapatigayon nga Western Visayas Regional Athletic Association (WVRAA) sa Antique.
Sa interview sang Bombo Radyo Bacolod kay Hernani Escullar, public information officer sang Department of Education-Western Visayas, wala sang major incidents nga namonitor sa hinampang apang indi malikawan nga may athletes nga maglain ang pamatyag apang on standby man ang mga doktor kag nurse.
Sa bahin naman sang security plan kag deployment sang Philippine National Police, wala man sang problema sa peace and order kag safety.
Samtang, gin-adjust ang schedule sang outdoor games kun sa diin suspendido ang tanan nga games halin alas- 10:00 sang aga tubtob alas- 2:00 sang hapon bangod sa tuman ka init.
Sa medal tally as of 10:30 am, sa Elementary level nagapanguna ang Negros Occidental nga may 14 ka gold medal, 10 ka silver medal kag 7 ka bronze medal; Iloilo nga may 10 ka gold, 10 ka silver kag 5 ka bronze; Capiz nga may 2 ka gold, 1 silver kag 5 ka bronze medal; Guimaras nga may 1 gold, 6 ka silver kag 1 ka bronze; Antique nga may isa ka gold kag 2 bronze medal; Aklan nga may 1 ka silver kag 8 ka bronze;.
Sa Secondary level, nagapanguna sa gihapon ang Negros Occidental nga may 12 ka gold medal, 6 ka silver medal kag 3 ka bronze medal; Iloilo nga may 7 ka gold kag silver kag 10 ka bronze; Aklan nga may 2 gold medal, 5 ka silver medal kag 3 ka bronze; Capiz nga may 2 ka silver kag 3 ka bronze; Guimaras nga may 1 ka silver kag 2 ka bronze; kag Antique nga wala sang may nakuha nga medalya.
Panawagan ni Escullar sa mga athletes nga yara lang ang kompetensya apang ang pag-abyan dapat nga magpabilin.
