Gin-athag ni Bacolod City Councilor Atty Caesar Distrito nga wala sang gahum ang Local Government Unit sang ciudad nga mag-intra sa ano man nga problema sa tunga sang Bacolod City Water District kag Primewater.
Sa interview sang Bombo Radyo sa konsehal, sa idalom sang layi, ang local water district yara sa idalom sang national government kag indi sa LGU.
Suno diri, ang Joint Venture Agreement yara sa tunga sang BACIWA kag Primewater kag ang ciudad wala sang kahilabtanan diri amo nga ginakwestyon sini kun ngaa ang ciudad ang madikta sa kontrata kag ma-cite sang violation.
Pahayag ni Distrito, kun may bayolasyon sa JVA dapat tun-an ini agud mahatagan sang nagakaigo nga penalidad santo sa nakasulat sa kontrata kag kun kinahanglan na nga may matabo nga pagfile sang kaso, dapat nga mapadulong sila sa korte kag indi sa LGU.
Samtang, para kay Distrito, indi manami ang ginhimo ni BACIWA Board of the Directors chairman Atty. Sonya Verdeflor, nga pagpagwa sang statement nga madula ang supply sang tubig nga nakatuga sang alarma sa pumuluyo.
