BACOLOD CITY — Nagpain ang provincial government sang masobra P21 million nga pondo para sa gintukod nga task force nga mapasiguro nga hilway ang Negros Occidental sa spill-over sang mga terorista durante sang nagapadayon nga krisis sa ciudad sang Marawi.
Suno kay Board Member Samson Mirhan, chairman sang Committee on Disaster Preparedness sa Sangguniang Panlalawigan, gintukod ni Governor Alfredo Marañon Jr. ang Task Force Buglas pinaagi sa isa ka executive order para sa seguridad sang probinsiya.
Suno diri, ang P21 million ang gintunga-tunga para sa mga ahensiya nga nagabug-os sang task force.
Ginpainan sang P8 million ang anti-criminality task group kun sa diin focal person ang Negros Occidental Police Provincial Office (NOCPPO), P4.3-M para sa Internal Security sa idalom sang Philippine Army, P1.5-M para sa Coast Watch nga pamunuan sang PNP Maritime Group kag P4-M para sa Humanitarian and Disaster Response.
Ginpainan man sang P1.8M ang Information Education Advocacy.
Ang secretariat sang Task Force Buglas sa idalom sang Provincial Planning and Development Offoce (PPDO) ang may P350,000.
Ang contingency fund nagabalor sang P438,000 kag ang mga equipment ginpainan sang P284,000.
Ang P21 million ang ginkuha sa unappropriated funds sang Provincial Disaster Risk Reduction and Management Office (PDRRMO) subong nga 2017.
