Gin-disinfect sang Bago City Fire Station ang nagkalain-lain nga public places sa Bago City agud malikawan ang coronavirus disease.
Ang ginpang-disinfect ang ginalakipan sang Bago City Hall, bago Health Center, Bago City Coliseum, public plaza, public market kag Bago City College.
Samtang ginatsekyar man ang temperatura sang lawas sang mga residente sa Bago nga nagagwa-sulod sa ciudad bilang kabahin sang tikang sang lokal nga gobyerno angot sa coronavirus disease.
Sa interview sang Bombo Radyo kay Police Major John Joel Batusbatusan, hepe sang Bago City Police Station, gindayaw sini ang koordinasyon sang Local Government Unit (LGU), City Disaster Risk Reduction and Management Office (CDRRMO) kag Bago CPS angot sa pagpatuman sang precautionary measures agud matapna ang paglapta sang coronavirus 2019 (COVID-19).
Ginpahayag sini nga ang CDRRMO, LGU kag City Health sang Bago ang nagahimo man sang tikang kaangay sang pagtsekyar sang City Health sang body temperature sang mga residente kag ginatatakan ini bilang indikasyon nga ini ang natsekyar na kag indi carrier sang nasambit nga virus.
Samtang, ginpahayag man sang hepe sang Bago City Police Station nga ginabantayan sang mga ini ang mga borders pasulod sa ciudad.
Suno kay Batusbatusan, santo sa ginmando sang headquarters, nagapatigayon sila sang border control operation nga ginpahamtang sa Brgy. Taloc, Bago City.
