Nakasuhan na ang pulis nga nagtiro sa isa ka 20 anyos nga lalaki sa Brgy. Gargato, Hinigaran Negros Occidental, tinalikdan nga gab-i.
Ang suspetsado ang ginkilala kay Corporal Ace Pacificar samtang ang biktima ang ginkilala kay Jinmar Baya.
Suno sa panaysayon sang amay sang biktima nga si Marlex Baya, may okasyon sa ila bangod nag-abot ang iya bayaw nagikan sa abroad.
Iya ginpahayag nga siya ang naggwa anay bangod wala pa man nakasugod ang nasambit nga okasyon agud magbakal kuntani sang inasal sang hinali lang nagpalapit sa iya si Pacificar nga nakainom kag siya ang ginpamangkot kun diin ini nagapuli.
Suno kay Marlex, siya ang gintayaan ni Pacificar sang armas kag gingapos padulong sa balay sang iya bayaw.
Nag-abot gilayon ang anak ni Marlex nga si Jinmar kag sang nakita ni Jinmar nga ginatayaan sang armas ang iya amay kag ginagapos, makuha kuntani ini sang cellphone agud manawag apang gulpi lang nagpalupok ang pulis.
Suno kay Marlex, posible nga gindumdom ni Pacificar nga makuha kuntani sang armas si Jinmar rason nga iya ini ginluthang.
Gin-ako sang amay nga tuman man ang iya kakulba sang natiruhan ang iya anak.
Samtang, ginpahayag naman ni Staff Sgt. Jomar Karela sang Hinigaran Municipal Police Station nga si Pacificar ang naassign sa Negros Occidental Police Provincial Office.
Base sa ila imbestigasyon, posible nga nasal-an ni Pacificar ang amay ni Jinmar nga isa sa mga kawatan sa lugar rason nga iya ini ginsita.
Nahibaluan nga ginpalukpan man ni Pacificar ang amay ni Jinmar apang wala ini na igo.
Suno kay Karela, .9mm caliber pistol ang armas nga gingamit sang pulis.
Ila naman ginpreparar ang kaso nga two counts sang frustrated murder batok sa suspetsado.
Samtang, padayon pa sa karon nga ginabulong ang biktima nga si Jinmar sa ospital nga naka-agum sang pilas sa natuo nga bahin sang iya nga liog.
Nakatiro pa gid sa banwa sang Pontevedra si Corporal Ace Pacificar samtang ini ang nagapalagyo matapos ang pagtiro niya kay Jinmar Baya sa banwa sang Hinigaran.
Sa pagpakig-angot sang Bombo Radyo kay Police Captain, Rhojn Darrel Nigos, hepe sang Pontevedra Municipal Police station, base sa mga witness sa insidente, ang suspetsado ang nagamaneho sang iya motorsiklo sang hinali lang ini nahulog sa Brgy. M.H Del Pilar.
Matapos nga natumba, buligan siya kuntani sang duha ka mga tawo nga nagasunod sa iya nga nagamaneho man sang motorsiklo apang hinali niya ini nga ginluthang.
Ginpahayag ni Nigos nga ang suspetsado ang yara karon nakahunong sa custodial facility sang Pontevedra Municipal Police Station kag napasakaan na sang kaso nga duha ka attempted murder.
Ang biktima naman ang gindala sa ospital para dapatan sang nagakaigo nga pagbulong.
Suno sa hepe, naghatag na ang Negros Occidental Police Provincial Office Director sang mando sa ila nga indi pag-itolerar ang malain nga mga buluhaton sang mga kapulisan.
