Napasakaan na sang administrative case kag ginhatagan sang dugang nga lima ka adlaw nga grace period ang police personnel nga na-assign sa Candoni Municipal Police Station nga nag-positibo sa gin-patigayon nga random drug testing sang tinalikdan nga Disyembre.
Sa interview sang Bombo Radyo Bacolod kay P/Lt. Abegeal Donasco, deputy spokesperson sang NOCPPO, ginpahayag sini nga sa lima ka mga pulis nga ginpaidalom sa random drug testing, ang wala ginhingadlan nga police corporal lang ang nagpositibo.
Nahibaluan nga makaduha ka bes na ini nga ginkuhaan sang confirmatory test apang positibo sa gihapon ang resulta.
Suno kay Donasco, sang Disyembre 16, gin-papanaugan na sang order ang amo nga police agud nga i-relieve sa Candoni Municipal Police Station kun sa diin iya man gin-surrender ang iya nga issued firearms.
Pagrelieved sa Police Corporal, ginpadala ini gilayon sa Regional Personnel Holding and Accounting Unit (RPHAU) sa PRO-6 kun sa diin on duty siya gihapon apang restricted kag wala ini ginapahanugutan nga magwa sa camp.
Suno kay Donasco, ginhatagan pa ini sang lima ka adlaw nga grace period agud mag-eksplekar sang iya nga bahin.
Sa karun suno diri, nagapadayon pa ang imbestigasyon apang in kaso nga makumpirmar nga guilty ini, dako ang tiyansa nga madismiss siya sa serbisyo.
