Nakaposas kag bantay-sirado sang mga kapulisan samtang yara sa ospital ang pulis nga nangluthang sang mag-amay sa Barangay Canjusa, Pulupandan, Negros Occidental sang kaagahon sang Disyembre 25.
Ginbawian sang kabuhi ang biktima nga si Joman Fuentes, 21 anyos, single, construction worker samtang pilason naman ang iya amay nga si Jomarie Fuentes, 52 anyos, kasado, construction worker, residente sa lugar.
Ang suspect amo si Police Corporal Armin Alanza, 36 anyos, residente sa lugar apang assigned sa 604th Company sang Regional Mobile Force Battalion 6 sa Southern Negros Occidental.
Sa interview sang Bombo Radyo Bacolod kay Negros Occidental Police Provincial Office Director Police Col. Rainerio de Chavez, yara pa gihapon sa isa ka pribado nga ospital ang pulis, apang ini ang ideretso sa Pulupandan Municipal Police Station sa iya nga paggwa.
Si Alanza ang padayun nga ginabulong bangod sa pilas sa ulo matapos ginlampusan sang siya ang ginakuyog.
Wala naman nakahibalo si De Chavez sa medical bulletin sang nasambitan nga pulis.
Apang ginseguro nila nga ini ang nakaposas kag may bantay nga mga police personnel.
Pahayag sang Provincial director nga apisar nga indi miyembro sang NOCPPO ang suspect, ini ang makaguba sang imahe sang Philippine National Police.
Pahanumdom sini sa mga kapulisan sa probinsya nga likawan gid ang maulamid sa mga komosyon.
Nagapakig-unong man ini sa nalisdan nga pamilya kag nagpasalig nga ila ihatag ang hustisya.
Sa karun ang NOCPPO ang nagapatigayon na sang parallel investigation para sa posibilidad sang pagpasaka sang administrative cases.
