Willing ang Punong Barangay sa Barangay Blumentrit, Murcia nga magkooperar sa imbestigasyon sang kapulisan angot sa nagtiro sang Indian Target sa aspin nga si Tiktok.
Sa interview sang Bombo Radyo Bacolod kay Punong Barangay Alan Martinez, ang insidente ang natabo sa Hacienda Puyas, nga suludlon na nga bahin sang Barangay.
Sa pagpadulong sini sa lugar, natumod nga si Tiktok ang masami nga naga-upod sa pagpahalab sang karbaw sang iya agalon nga 14 anyos.
Apang sa pagbalik sang bata, nabilin sa ginlawigan sang karbaw ang ido kag ini ang wala na nakapauli tubtob maggab-i.
Sang ginbalikan sang bata, didto na niya nakita nga nahigot sang alambre ang liog sang ido kag may lima ka igo sang Indian Target.
Ginreport man nila ini sa Barangay kag ginpost sa social media, kag didto na ginrescue sang BACH Project kag gindala sa veterinary clinic agud ma-operahan.
Suno diri, indi pa nila matumod ang may kahimuan sang pagpanghalit bangod kasi-utan ang lugar kag malayo sa mga pamalay.
Apang ginmando na sini sa mga Barangay Tanod nga mangusisa sa palibot.
Panawagan man sini sa mga may impormsyon nga gilayon nga magdangop sa Barangay.
Ginapahanumdom sini nga ginadumilian ang pagpanakit sang kasapatan bangod may-ara sang layi batok diri, kag mahimo nga ikapriso.
Samtang panugyan man sini sa mga agalon sang ido nga kun mahimo mahigtan ang kasapatan ukon mapatinir lamang sa sulod sang compound agud malikawan nga makahalit ukon ang mga ini ang mahalitan kaangay sa natabo kay Tiktok.
Samtang ginpahanumdom man sang abogado nga may pangatubangon nga kaso kriminal ang mga nagapanakit sang sapat.
Sa interview sang Bombo Radyo Bacolod kay Atty Jomax Ortiz, sa idalom sang Animal Welfare Act, ang sapat ang ginhatagan sang kinamatarong kaangay man sa tawo.
Gani indi mahimo nga sila ang sakiton, labuon ukon tiruhon bisan pa ini ang mga layaw nga ido, kaangay sang pagtiro sang Indian Target kay Tiktok.
Apisar nga magamay lamang ang time of imprisonment, pahanumdom sang abogado nga ini ang paglapas gihapon sa kasuguan.
