Gin-athag sang punong barangay sang Anahaw, Hinigaran nga indi nila mapunggan ang isa ka hog raiser nga magbaligya sang baboy sa gwa sang ciudad antes nagpositibo sa African Swine Fever ang baboy nga ginbaligya sa Victorias Milling Company.
Sa interview sang Bombo Radyo kay Punong Barangay Freddie Mongcal, madamo nga baboy ang ginbaligya sang mga taga-Barangay Anahaw apang maayo pa ang kondisyon sang mga ini gani ginhatagan nila sang Barangay Clearance.
Ginhatagan naman nila sang clearance ang hog raiser nga nagbaligya sa Victorias Milling Company bangud negosyo nila ini kag indi sarang mapunggan kun wala man nagabalatian.
Suno kay Mongcal, wala na sila nakahibalo kun ano ang natabo nga nagpositibo sa ASF test ang ginbakal sang Victorias Milling Company.
Pati si Mongcal ang napatyan man sang baboy bangud sa balatian.
Ginpanugyanan naman ang mga ini nga obserbahan ang mga baboy bangud sa pila ka baboy nga nagkalamatay kag tubtub subong, may mga nagakapatay gihapon.
Suno sa Himamaylan City Agriculture’s Office, heat stroke ang ginkamatay sang mga baboy apang nagapati ang punong barangay nga imposible nga heat stroke ang gintunaan sang ila tanan nga kamatayon.
Ginalibot naman sang barangay officials ang barangay agud mamonitor ang nagamasakit nga baboy apang aminado ini nga ginasekreto sang iban nga hog raisers ang sitwasyon sang ila baboy bangud luyag sang mga ini nga mabaligya pa bangud mahal ang kapital.
Ginpanugyanan naman sila nga ilista ang numero sang mga baboy nga napatay sa kada hog raiser bangud magahatag sang bulig pinansyal apang wala pa ini sang ideya kun pila.
Sa karon, may yara na sang checkpoint sa dulunan sang Himamaylan sa katupad nga banwa kag ciudad.
