Nagnubo ang kaso sang rabies sa probinsya sang Negros Occidental subong nga tuig 2019.
Sa interview sang Bombo Radyo Bacolod kay Dr. Ryan Janoya, Provincial Rabies Coordinator sang Provincial Veterinary Office, ginkompirmar sini nga nagnubo ang kaso sang rabies sa probinsya subong nga 2018 kun ikumparar sang nagligad nga tuig.
Suno kay Janoya, halin sa 28 ka mga kaso sang rabies sang 2018, may yara nalang subong sang 18 ka mga rabies positive nga mga ido.
Suno sa iya, ang syudad sang Himamaylan ang may yara sang pinakamadamo nga kaso bangud napulo sa 18 ang halin sa nasambit nga syudad.
Ang nabilin nga walo ang naghalin sa Sipalay, Candoni, Silay, EB Magalona kag Bacolod.
May yara man sa karun sang 10 ka mga suspected rabies cases sa tawo suno sa ila nga record.
Suno sa provincial rabies coordinator, 269,000 ang populasyon sang mga ido sa sugod sang tuig 2019.
Ginpahayag man sini nga 80% sang populasyon sang mga ido sa probinsya ang target nga mabakunahan apang yara palang sa karun sa 50% ang nabakunahan.
Ginhangkat man sini ang mga pumuluyo nga kun sila ang makagtan sang ido, gilayon gid nga magkadto sa pinakamalapit nga health center agud ini ang mahatagan sang bakuna.
Nagahingyo man ini sa mga nagasagod sang ido nga mangin responsable agud indi na madugangan ang kaso sang rabies sa probinsya.
