Gin-athag sang Negros Electric and Power Corporation (NEPC) nga nadelay ang paghatag sang billing para sa bulan sang Agosto sa pila ka mga lugar bangod manual ang pagpatigayon sang reading.
Sa interview sang Bombo Radyo Bacolod kay NEPC Spokesperson Jonathan Cabrera, gin-athag sini nga iya pa sang Central Negros Electric Cooperative (CENECO) ang nasambitan nga billing period.
Apang bangod sa transition, may-ara man sang adjustment partikular na sa ginagamit nga gadgets sang third party nga nagapatigayon sang spot billing para sa CENECO, gani manual lamang ang ginpatigayon nga reading sa pila ka lugar.
Sa manual reading, mano-mano nga ginabasa sang CENECO pesonnel ang kontador kag mano-mano man ang pagprint sang statement of account.
Indi kaangay sa spot billing, kun sa diin ang billing gadgets ang automatic nga nagarelease sang statement of account sa tagsa ka kontador.
Ginpasalig naman sang billing department nga apisar delay ang reading, wala sang adisyunal nga adlaw sa electric bill, kag magapabilin gihapon sa coverage nga isa ka bulan.
Dugang pa sini nga humalin sa pagbatun sang electric bill, ang account holder ang hatagan pa sang 10 days grace period para ini ang mabayaran.
Bangod ini ang iya pa account sang CENECO, magapabilin man ang paagi sa pagbayad.
Samtang sa tion nga indi mabayaran, ginpasalig man ni Cabrera nga wala pa sang patigayunon nga disconnection.
Apang sa tion nga makapatigayon na sang masunod nga reading kag wala pa gihapon mabayaran ang due, didto na ang mga ini magapadala sang notice of disconnection.
