Napasakaan na sang kaso nga estafa kag vote buying ang duha ka persona nga nag-tanyag sang scholarship program sa masobra 200 ka mga estudyante sa diin ila gin-pabayad kag gina-pasiguro ang boto sang mga ini sa kandidato nga ila gina-obrahan.
Sa interview kay Atty. Rhodora Lo, abogada sang mga tag-reklamo, napasaka na nila ang kaso sa Himamaylan City Prosecutor’s batuk sanday Manny John Yude, naga-obra sa opisina sang isa ka kandidato nga naga-padalagan sa amo nga syudad kag si Punong Barangay Cherry Hope Belarga sang Barangay Su-ay.
Suno kay Lo, ang duha ka mga suspetsado ang nag-pirma sang certificate of attendance kag appearance nga gin-hatag sa mga estudyante kag gin-pabayad sang P390 kag pag-hatag sang qouta sa pagbaligya sang ticket nga balor P500 sadtong fiesta sa barangay kag pag-panghatag sang poster sang kandidato agud dal-on sa tagsa ka puluy-an sang mga estudyante kag mag-selfie nga amo ang isa sa mga requirements agud makapasar sa nasambit nga programa.
Suno kay Lo, wala pa nila napasakaan sang kaso ang nag-pasimuno sang peke nga scholarship program nga amo ang ALYANSA TOGA nga linyada sang Tongson-Gatuslao tandem nga naga-padalagan sa syudad sang Himamaylan.
Date of airing: April 25, 2019
