BACOLOD CITY — Nagapreparar na ang pila ka ahensya sang gobyerno sang ila nga transition plan kasunod sang Executive Order ni Presidente Rodrigo Duterte nga nagabungkag sang Negros Island Region.
Sa exclusive interview sang Bombo Radyo, ginpahayag ni Director Livino Duran sang Department of Environment and Natural Resources nga ginahanda ang transition plan agud nga mangin matalunsay ang ila pagbiya sa NIR.
Sang nahibaluan ang balita, kaupod ni Duran si DENR Secretary Roy Cimatu sa isa ka programa sa Dumaguete City kag ginpanugyanan siya sini nga istoryahan sa Lunes kun ano ang plano sang central office para sa ila.
Apang sa bahin sang regional office suno kay Duran, igaplastar naman nila sa Lunes kun paano mapatuman ang transition plan.
Kalakip diri ang paghitso kun sa diin igabutang ang mga equipment sang regional office kag ang pagpanagtag sang ila mga personnel.
Aminado si Duran nga halos tanan nga personnel sa DENR NIR ang contractual rason nga ila diskusyunan kun sa diin ipangsaylo ang mga ini.
Wala man sini ginadula ang posibilidad nga may madulaan sang trabaho apang indi gid tuman kadamo.
Nagpadulong naman ang planning officer sang PENRO sa DENR Region 6 agud masiguro nga malakip ang pondo sang Negros Occidental sa budget sa tuig 2018.
May kaangtanan sini, magabalik si Duran sa Department of Environment and Natural Resources Region 6 sa tion nga lubos na nga mabungkag ang DENR NIR.
Si Duran ang assistant regional director sang DENR Region 6 antes ini ginbutang bilang director sang NIR.
Suno diri, ginlahugan siya kahapon ni Secretary Roy Cimatu sa ila nga pag-upod sa programa sa Dumaguete City nga sa Iloilo na ang liwat nila nga pagkit-anay.
Nakabutang man sa Executive Order 38 ni Presidente Rodrigo Duterte nga magabalik ang mga empleyado nagikan sa NIR sa ila nga anay deployment units sa sulod sang 60 ka adlaw.
Nagpasalamat si Duran sa kahigayunan nga ginhatag sa iya agud nga makaserbisyo sa mga pumuluyo sang NIR.
Kaangay sang iban, nanugon man ang regional director sa pagkatunaw sang NIR bangud kun lantawon ang statistics, dako ang kontribusyon sini sa Gross Domestic Product sang Pilipinas.
Bisan si Secretary Cimatu suno kay Duran ang aminado man nga madamo na kuntani sang hinimuan ang opisina sa NIR.
