Luyag anay ni Senate President Francis “Chiz” Escudero nga makay-o ang relasyon sang Senado kag House of Representatives antes diskusyunan ang mga proposals agud i-amend ang 1987 Constitution.
Ini ang sabat ni Escudero matapos nagpabutyag sang optimism si House Speaker Martin Romualdez nga ang Senado, sa idalum sang pagpamuno ni Escudero, ang magakonsiderar sa pag-amend sang ila ginlaragway nga “restrictive” economic provisions sang Konstitusyon.
Sa Kapihan sa Senado kahapon, ginpasalamatan ni Escudero si Romualdez sa iya maayo nga mga tinaga kag sa pagrespeto sang prerogatives sang Senado bangud ini ang iya counterpart sa Kamara.
Suno diri, siya ang makigkita sa House Speaker sa tion sang break agud diskusyunan ang ila relasyon kag makay-o ang kinahanglan nga kay-uhon sa relasyon sang duha ka chamber sang Kongreso kag pagtukod sang rules kag protocols kun paano magcoordinate nga may respeto natuhoy sa ginaduso sang Kamara kag sang Senado agud malikawan ang mga misunderstandings kag miscommunications.
Nagalaom si Escudero nga wala na sang pagbayluhanay sang indi maayo nga mga tinaga sa tunga sang duha ka chambers in kaso nga may mga disagreements sa ila mga positions sa Charter Change bangud ini ang makabig nga “unparliamentary.”
