Temporaryo nga ginpostpone ang rematch nanday Manny Pacquiao kag Floyd Mayweather Jr. sini kuntani nga Setyembre 2026, nga wala sang maathag nga rason kag wala pa sang gin-anunsyo nga bag-o nga petsa.
Suno sa bahin ni Pacquiao, target nila ang first half sang 2027 kun matigayon ang match.
Suno pa diri, may pila ka problema sa bahin ni Mayweather bangud ini ang may ginapangatubang nga kaso, overbooking sa schedule, kag indi pag-hangpanay sa pinansyal nga aspeto.
Isa man ka madako nga isyu amo ang sahi sang rematch sa diin ginpanindugan ni Pacquiao nga ang napirmahan nga kontrata ang para sa opisyal nga professional boxing match, kag indi exhibition lamang.
Madumduman nga nagpahayag si Mayweather sang tinalikdan nga Marso nga exhibition lamang ang rematch batok kay Pacquiao.
Suno kay Pacquiao, luyag sini nga mangin opisyal ang match up agud marecord ang daug batok kay Mayweather sa professional record sini kag makuha ang labing una nga pierde ni Mayweather sa iya professional boxing record.
