Duha ka ginapatihan mga anay miyembro sang Revolutionary Proletarian Army-Alex Boncayao Brigade (RPA-ABB) ang patay samtang tatlo naman ang pilason matapos ginlusob sang ginapatihan miyembro sang New People’s Army ang ila nga resettlement site sa Kabankalan City, Negros Occidental kaina sang kaagahon.
Sa interview sang Bombo Radyo Bacolod kay Police Lt. Col. Jonel Guadalupe, hepe sang Kabankalan City Police Station, nagatulog ang mga biktima sang gin-harass sang ginapatihan mga miyembro sang NPA ang ila ginapuy-an sa Sitio Mambinay, Barangay Locotan, pasado ala-1:00 sang kaagahon.
Ginpaarakan sang luthang sang mga suspetsado ang mga biktima nga nagresulta sa ila kamatayon.
Wala pa natumod ang pangalan sang mga biktima apang lunsay mga lalaki ang nagkalamatay.
Isa sa mga pilason ang gindala sa Lorenzo Zayco District Hospital sa Kabankalan samtang ginabulong naman sa Corazon Locsin Montelibano Memorial Regional Hospital ang duha.
Suno kay Guadalupe, ginatumod pa ang numero sang mga suspetsado nga armado sang matag-as nga kalibre sang armas-luthang.
Nahibaluan nga ang RPA ang military wing sang Rebolusyonaryong Partido ng Manggagawa ng Pilipinas nga breakaway group sang Communist Party of the Philippines.
Suno sa hepe, tsekyaron nila ang listahan sang Office of the Presidential Adviser of the Peace Process (OPAPP) agud matul-id kun miyembro sang RPA-ABB ang mga nagkalamatay.
Ang resettlement site ang proyekto sang OPAPP kabulig ang local government unit.
