Liwat nga nag-apelar si Punong Barangay Joselito Abaring sang Barangay Bata, Bacolod City sa mga pumuluyo sini ilabi na sa mga nagpromisa nga magpanghawan sang ila illegal structures kag road obstructions subong nga bulan sang Enero nga tumanon na ang ila pangako kag magsunod sa mando sang gobyerno.
Madumduman nga ginhatagan sang Department of the Interior and Local Government (DILG) sang 60 ka adlaw ang mga local government units (LGUs) agud liwat magpanghawan sang mga dalanon nga nagsugod sang Nobyembre 16, 2020 kag magatakop sini nga Enero 15, 2021 matapos ini nasuspinder sang pito ka bulan bangud sa coronavirus pandemic.
Sa interview sang Bombo Radyo Bacolod kay Abaring, ginpahayag sini nga minimal lang ang ila gindugang sa road clearing operations bangud nasuguran na ini sadto.
Ila naman gin-follow up halin sang Lunes ang mga nagpromisa nga mangkakas na sang illegal structures.
Suno sa iya, may yara gid sang resistance ang pila ka mga residente bangud indi nila luyag nga gub-on ang ila nga illegal structures bangud amo lang ini ang ila pangabuhian.
Apang, may yara naman sang iban nga boluntaryo kag mato-mato nga nagapanghawan.
Nagalaom naman si Abaring nga indi na maglab-ot pa sa linalisay kag magsunod nalang ang mga pumuluyo bangud mando ini sang national government.
