Kumpirmado nga nalakip sa 19 ka napatay nga New People’s Army si Roger Fabillar, alyas Arnel Tapang, alyas Jhong/ Nono/ Domeng nga amo ang commanding officer sang Northern Negros Front sa natabo nga engkwentro sa Brgy Salamanca, Toboso, Negros Occidental kahapon.
May yara man sang alegasyon nga may nalakip nga foreign national sa mga napatay apang ini ang subject for confirmation pa.
Naretrieve na ang tanan nga bangkay apang wala nangin mahapos ang operation bangod madalom ang fishpond kun diin nahulog ang mga NPA.
Sa interview sang Bombo Radyo kay BGen. Ted Dumosmog, Commander sang 303rd Infantry Brigade, posible nga naggikan sa nagkalain-lain nga lugar ang mga NPA bangod iban indi man kilala apang halos tanan may yara gid sang armas.
Ang mga bangkay ginsulod sa body bag kag gindala na sa punerarya kag suno diri kun mahimo maclaim sang pamilya ang ila himata para mahatagan sang nagakaigo nga paglubong.
Suno kay Dumusmog may isa ka suldado nga pilason nga nag-agom sang duha ka igo san bala, ang sa karun ginabulong pa sa ospital sa Bacolod City.
Mensahe sini sa mga NPA nga magpanaog na kag batonon ang programa sang gobyerno para sa malinong nga pagpangabuhi.
Naghatag man ini sang pasalig sa mga pumuluyo nga handa ang kapulisan kag kasuldadohan para protektahan ang komunidad kag mahatag ang kalinong.
