Magapadayun ang schedule sang filing sang Certificate of Candidacy para sa Barangay and Sangguniang Kabataan Election sa Setyembre 28 tubtob Oktubre 5.
Sa interview sang Bombo Radyo Bacolod kay Bacolod City Election Officer Atty Katrina Trinio Cania, wala sang pagbag-o sa calendar of activity sang Commission on Election (COMELEC).
Humalin Setyembre 28 tubtob Oktubre 21, dumilian naman ang premature campaigning.
Suno kay Cania, ang venue sang COC filing ang gintalana sa 3rd floor sang SM City Bacolod.
Ini bangod sa 61 ka Barangay sa Bacolod, yara ang posibilidad nga madamo sang magfile sang COC bilang Punong Barangay, Barangay Kagawad, SK Chairman, kag SK Kagawad, gani kinahanglan nila sang malapad nga area.
Kadungan sang inspection sa mga eskwelahan nga mangin voting precinct, nakakoordinar naman sila sa mga School Principal kun pila ka classroom ang gamiton.
Samtang sa mga Electoral Boards, ini ang mahimo magbag-o pa bangod sa posibilidad nga may mga himata ang mga ini nga magpapili, kag sila ang madisqualify.
Paathag ni Cania nga apisar sa posibilidad sang postponement sang eleksyon, sila ang indi maka-untat sa pagpreparar agud makaseguro nga preparado na ang tanan, kun ini ang magpadayun.
Sa pihak nga bahin, si Cania ang tubtob na lamang sa Setyembre 25 magaserbe nga Bacolod City Election Officer.
Siya ang magaserbe na nga Clerk of Court sa Regional Trial Court Branch 52.
