Arestado ang isa ka Sangguniang Kabataan Kagawad kag duha ka iban pa sa drug buybust operation nga ginpatigayon sa Prk Luyan, Brgy Tinampa-an, Cadiz City alas-7: 21 sang gab-i, Hulyo 16.
Sa impormasyon sang Bombo News Team, ang subject person ang ginkilala nga si Roland Payusan alyas Bingbong, 26 anyos, SK Kagawad, kag residente sang Prk Bolinao, Brgy Zone 6, Cadiz City.
Nadakpan man ang duha sini nga kaupod nga sanday Jacky Jo Villanueva, 26 anyos, single, wala sang trabaho, kag residente sang Querosan Street, Brgy Zone 4, Cadiz City; kag Roger Gamgam, 28 anyos, single, wala sang trabaho, residente sang Teachers Village, Brgy 1, Manapla.
Sa interview sang Bombo Radyo Bacolod kay Police Lt Daleen Grace Loreno, deputy chief of Police sang Cadiz City Police Station, ini ang una nga termino ni Payusan bilang SK member matapos magdaog sa 2023 Elections.
Siya ang ginakonsiderar nga High Value Individual, kag una nga namonitor sa pag-engage sa illegal drug transaction nakaligad nga tuig.
Apang ang hayo lamang nga Bingbong ang gamit sini, kag sang damlag lamang natumod nga ini ang SK Kagawad.
Suno kay Loreno, ang supply ang gikan sa Manapla.
Wala naman sang nagakatabo nga physical contact sa tunga sang suspect kag sang parokyano bangod ang transaksyon ang nagakatabo sa messenger, kag ginapicturan lamang ang drug items kag ini ang ginapick-up na lamang sang buyer.
Nakuha sa mga ini ang pito ka sachet sang suspected shabu, nga nagabalor masobra P30,000; samtang nakuhaan naman sang cal. 38 revolver si Gamgam.
Ang tatlo ang mangatubang sang kaso sa paglapas sa Republic Act 9165 ukon Comprehensive Dangerous Drugs Act of 2002.
Si Gamgam ang may adisyunal man nga kaso sa paglapas sa Republic Act 10591 ukon Comprehensive Firearms and Ammunition Regulations Act.
May pangatubangon man nga Administrative cases si Payusan, kag mahimo makakas bilang SK member.
