Nangin madinalag-on ang selebrasyon sang 86th Charter Day sang Bacolod City, kahapon.
Ang 86th Bacolod City Charter Day ang may tema nga ‘Pagsaulog sang Pagbag-o Para sa Mas Masanyug nga Asenso sang Bacolod’.
Nagpaindis-indis kagab-i ang mga barangay sang ciudad sa Barangay Festival Dance Competition nga ginhiwat sa Bacolod City Government Center.
Sa ginpatigayon nga Charter Day Awarding Ceremonies, walo ang nagbaton sang ‘most outstanding employees’ award, kag nagbaton sang top realty taxpayers awards ang lima ka individual kag lima ka corporation top business taxpayers kasubong man nga may ginhatag nga award para sa Be The Change Award kag Ang Banwahanon.
Sa mensahe ni Bacolod City Mayor Alfredo ‘Albee’ Benitez, padayon ang ila nga pagtrabaho para sa mas masanyog nga ciudad sang Bacolod.
Suno sa alkalde, ginakilala sang ciudad ang maayo nga pagbayad sang mga tax payers nga amo ang rason nga nagapadayon ang development sang Bacolod.
Naghatag man sang congratulatory message si Bacolod City Lone District Congressman Greg Gasataya sa tanan nga Bacolodnon.
Ginapasalamatan sini ang tanan nga nangin kabahin sang pagsanyog sang ciudad kasubong man sa nagbulig sa pagpatukod sang Bacolod General Hospital kag Bacolod Negros Economic Highway.
Naghatag man sang mensahe si Negros Occidental Governor Eugenio Jose ‘Bong’ Lacson kag suno diri, padayon ang pagbag-o, apang ang pagbag-o sang ciudad makabig nga extraordinary change.
Ini bangod sa tanan nga nagtrabaho para sa komuninad kag pagtuman sang responsibilidad sang isa kag isa.
