Nangin madinalag-on ang selebrasyon sang 126th AL Cinco de Noviembre sa ciudad sang Bago, Negros Occidental kahapon, Nobyembre 5.
Sa interview sang Bombo Radyo Bacolod kay Bago City Mayor Nicholas Yulo, ginpasalamatan sini ang mga personnel sang tourism office sa ciudad sang Bago sa madinalag-on nga pagsaulog sang pagdumdom sang maragtas.
Suno kay Yulo, nangin matawhay man ang pagsaulog sang Al Cinco de Nobyembre.
Nanamian man ang alkalde bangud nga madamo ang bag-o nga nagpakigbahin sa pagsaot kag reenactment sang maragtason nga hitabo sadto sa ciudad.
Ginpahayag man sini nga may yara sila sang mga German guests nga nagabulig sa mga environmental projects sang Bago City.
Suno kay Yulo, ang pagpatigayon sang programa para sa Al Cinco de Noviembre ang pagpadumdom sa mga pamatan-on sang maragtas kag nagapanawagan nga ipabilin kag ipadayon ang bunga sang sakripisyo sang mga katigulangan.
Ang parada naman kag sigabong sa Bago City ang ginpasakupan sang clustered Barangays.
