Hugot ang pagsalig ni Senator Ronald ‘Bato’ Dela Rosa nga maka-angkon sang nagakaigo nga boto ang hagna para sa mandatory Reserve Officers’ Training Corps sa pagpanalawsaw sa Senado.
Ang statement ang ginpagwa sini karun nga nagataas ang tensyon sa tunga sang Pilipinas kag China may kaangtanan sa West Philippine Sea.
Suno diri, dapat preparado antes magkadto sa gyera, gani dapat makapreparar na agud indi na magdangat pa sa gyera.
Kalakip sa preparasyon ang pagpreparar sa mga pumuluyo sa ano man nga posibilidad sang armado nga pagpakigbato.
Nakita sini nga ang ROTC Program ang isa sa pamaagi agud ini ang mahimo sang gobyerno.
Aminado ini nga ulihi na ang tikang, apang nagapati ang Senador sa kasabihan nga ‘better late than never’.
Suno kay Dela Rosa, ginhambalan ini ni Senate Majority Leader Francis Tolentino nga ang hagna ang isa sa una nga nakaschedule nga talakayon sa pagbalik sang Senator gikan sa break.
Suno kay Dela Rosa, dako ang pagsalig sini nga suportahan sang mga Senador ang hagna.
