Nagpanawagan si Senator Imee Marcos sa Sugar Regulatory Administration (SRA) nga himuon sang mga ini ang ila nga mga katungdanan agud nga mabuligan ang mga sugar farmers kasubong man ang mga kunsumidor.
Suno kay Marcos, ang farm gate price sang kalamay nakaligad nga harvest season sang mga tubo ang yara lamang sa P2700 tubtob P2800 kun sa diin tuman ka nubo apang indi man mabatyagan sang mga kunsumidor sa merkado.
Suno sa senadora, makaluluoy ang mga sugar farmers bangud sa tuman ka nubo nga farmgate price.
Suno diri, dapat pangitaan sang paagi sang SRA nga mangin P3000 ang farmgate price sang kalamay sa madason nga harvest season.
Ginpahayag sini nga sadto P2 billion pa ang budget para sa SRA apang ginbuhinan ini kag nangin P500 million nalang bangud wala man ini ginagasto sang ahensya agud nga mabuligan ang mga sugar farmers kag mapanubo ang presyo sang kalamay sa merkado.
Suno kay Marcos, sa karun nagaayo ang SRA nga ibalik sa P2 billion ang budget sang mga ini kag idugangan sang P3 billion agud mangin P5 billion.
Suno diri, dapat ipakita anay sang SRA nga nagaimprove ang ila performance antes ang pag-ayo sang dugang nga budget bangud kun manubo sa gihapon ang farmgate price sang kalamay, mangin wala na sang pulos ang SRA.
