Patay ang isa ka senior citizen nga babayi matapos nga mabungguan sang Ceres bus sa Barangay Caduhaan, Cadiz City, Negros Occidental kagab-i, Abril 9.
Sa interview sang Bombo Radyo Bacolod kay Richmond De Asis, Barangay Secretary sang Barangay Caduhaan, mga alas 7:00 ang takna kagab-i may yara sang napanawag nga residente sang Purok Bougainvella, Barangay Caduhaan nga may yara sang aksidente nga nagluntad sa national road sang Barangay.
Suno kay De Asis, ang biktima ang nagtabok sa dalan apang timing man nga naglabay ang ceres bus kag nabungguan ini.
Ini ang may baklon kuntani rason nga nagtabok sa dalan.
Nakaangkon sang samad sa ulo ang biktima bangud sa mabaskog nga impact.
Gintawgan man sang rescue agud nga makuha ang biktima.
Matapos nga makuha ang biktima nakita sang Barangay Secretary sa social media posts sang mga mga himata sang biktima nga ini ang ginbawian sang kabuhi.
