Pilason ang isa ka senior citizen matapos nga gintiro sang wala pa makilal-an nga suspetsado sa Purok Mabinuligon, Barangay Maricalum, Sipalay City, Negros Occidental.
Ginkilala ang biktima kay Efren, 63 anyos kag residente sang nasambit nga lugar.
Sa interview sang Bombo Radyo Bacolod kay Police Captain Jose Michael Muñez, Deputy Chief of Police sang Sipalay City Police Station, nakabaton sila sang impormasyon nagikan sa concerned citizen nga may yara sang nagluntad nga shooting incident sa nasambit nga lugar.
Suno kay Muñez, gilayon sila nagpatigayon sang checkpoint kag ginpamangkot man sini sang imbestigador kun ano ang identity sang suspek.
Sa imbestigasyon sang mga kapulisan, nagapadulong sa Sipalay City proper ang biktima sang hinali lamang nga may nagtiro sa iya.
Nakaresponde man gilayon ang Sipalay City Disaster Risk Reduction Management Office kag ini ang gilayon gindala sa infirmary agud mabulong.
Ang biktima ang nakaagom sang pilas sa natung-an sang ulo kag tangkugo.
Magadul-ong ini kuntani sang iya apo sa eskwelahan.
Suno kay Muñez, estable na ang condition sang biktima sa ospital sa ciudad sang Bacolod.
Wala man sang CCTV sa lugar bangud ang lugar ang napalibutan sang banglid kag highway padulong sa nabukid nga bahin sang ciudad.
Nagapadayon pa sa karun ang imbestigasyon sang Sipalay City Police Station kag ginatumod pa ang motibo sa pagtiro sa biktima.
