Wala sang may nakita nga foul play ang Silay City Police Station sa kamatayon ni anay Silay City Mayor Carlo Gamban kahapon.
Sa interview sang Bombo Radyo Bacolod kay Police Lt. Col. Mark Anthony Darroca, hepe sang Silay City Police Station, napadala na ang request para sa ballistic examination sa forensic unit sang Negros Occidental Police Provincial Office (NOCPPO) samtang ginapreparar man ang SOCO report kag ginahulat ang resulta sang postmortem examination.
Suno diri, magapatigayon pa sang follow up interview sa mga kaupod sang anay alkalde sa sulod sang balay.
May yara sang narekober nga caliber 38 revolver gikan sa sulod sang kwarto sang anay alkalde kun diin ini nasapwan nga wala na sang kabuhi.
May narekober man nga apat ka live ammunition kag isa ka slug nga sa karun gina-imbestigaran pa kun ini ang naghalin sa armas-luthang nga narekober.
Nakit-an man nga may igo sang pagpanglutghang sa natuo nga bahin sang ulo ang anay alkalde nga naglapos pa sa pihak nga bahin sang iya ulo.
